Հայերեն Russian

Արշակ Կարապետյանի գլխավորությամբ՝ հայ ժողովուրդը կհեռացնի Նիկոլ Փաշինյանին իշխանությունից

Անցած տարվա հոկտեմբերին ՀՀ պաշտպանության նախկին նախարար Արշակ Կարապետյանը Մոսկվայում հայտարարեց «Համահայկական ճակատ» շարժում ստեղծելու մասին, որին հետագայում միացան կուսակցություններ, հասարակական կազմակերպություններ, անհատներ:

Մեկ շաբաթ հետո Երևանում տեղի է ունենալու նույնանուն՝ «Համահայկական ճակատ» կուսակցության համագումարը, որի ստեղծումը չի նշանակում, որ շարժումը լուծարվում է, կամ դրան միացող ուժերն ու անհատներն են մտնում նորաստեղծ կուսակցության մեջ: Ընդհակառակը՝ նոր ստեղծվելիք կուսակցությունը ևս կմիանա շարժմանը:

Մեզ ավելի շատ հետաքրքրում է նոր կուսակցության ստեղծման նպատակը. ըստ Արշակ Կարապետյանի՝ այն ստեղծվում է՝ քաղաքական առաջիկա պրոցեսներին մասնակցելու համար, իսկ ինչ պրոցեսների մասին կարող է խոսք լինել:

Ակնհայտ է, որ Արշակ Կարապետյանն, առաջիկա քաղաքական պրոցես ասելով, ի նկատի ունի արտահերթ պրոցեսները, որովհետև խորհրդարանական հերթական  ընտրություններին դեռ երկու տարուց ավելի ժամանակ կա: Դժվար է պատկերացնել նաև, որ պաշտպանության նախկին նախարարը կուսակցություն է ստեղծում ինչ-որ համայնքային ընտրությունների մասնակցելու համար, հատկապես իր հայտարարությունից հետո, համաձայն որի՝  իր նպատակը գործող դավաճանական ռեժիմի հեռացման միջոցով Հայաստանի փրկությունն է: Հենց այդ նպատակի իրագործման նպատակով են նրա շուրջ համախմբվել «Համայակական ճակատ» շարժմանը միացած ուժերը: Նշանակում է՝ խոսքն արտահերթ քաղաքական պրոցեսների մասին է:

Արտահերթ պրոցեսների անհրաժեշտությունը կախված է օդի մեջ, որովհետև հերթականին Հայաստանը կարող է չհասնել, մինչ այդ Հայաստան կարող է և չլինել:

Փաշինյանն իր աթոռն ու իշխանությունը պահելու համար պատրաստ է Հայաստանը մաս-մաս հանձնել Ադրբեջանին, նա և նրա իշխանության տարբեր ներկայացուցիչներ արդեն առանց ամոթի և վախի հայտարարում են, որ հայկական այս կամ այն տարածքն ադրբեջանական է, և որ իրենք պատրաստ են դրանք հանձնել թշնամուն: Իսկ դիմադրողներին, չհամաձայնվողներին սպառնում են Ադրբեջանով, ասում են, եթե չհամաձայնվեք, Ադրբեջանը միևնույն է այդ տարածքները գրավելու է, իսկ բոլոր նրանք, ովքեր կդիմադրեն` կոչնչացվեն Ադրբեջանի կողմից: Ավելի լկտի ու թշնամական  քարոզչություն սեփական երկրի և ժողովրդի դեմ դժվար է պատկերացնել:

Ո՞վ կարող է այս իրավիճակում կազմակերպել Հայաստանի դիմադրությունը և ապահովել մեր հաղթանակը. միանշանակ մարդ, ով ունի մարտական փորձ, ունի թշնամու դեմ կռվելու և հաղթելու փորձառություն: Արշակ Կարապետյանը հրապարակային հայտարարեց, որ Փաշինյանն իրեն Պաշտպանության նախարարի պաշտոնից հեռացրել է միայն թշնամուն դիմադրելու հրաման տալու, և մեր տարածքը թշնամուց պաշտպանելու համար:

Փաշինյանն Արշակ Կարապետյանին հեռացրեց, որովհետև ինքն էր թյուրիմացաբար զբաղեցնում երկրի ղեկավարի պաշտոնը, հիմա եկել է ժամանակը, որ, Արշակ Կարապետյանի գլխավորությամբ հայ ժողովուրդը հեռացնի Նիկոլ Փաշինյանին իշխանությունից: Եվ, եթե Փաշինյանն Արշակ Կարապետյանին հեռացրեց պաշտոնից իր տերերին ծառայելու համար, իր պաշտոնը պահելու համար, ապա առաջիկայում սպասվող պայքարն իշխանության կամ պաշտոնի կռիվ չի լինելու, լինելու է պայքար հայրենիքը փրկելու, հայրենիք ունենալու մեր իրավունքը պաշտպանելու համար:

Առաքել Առաքելյան

Կիսվել սոց․ ցանցերում ՝